Goierriko Hitza

2008-05-05 | 16:16:31

Dioni Galparsoro, Italiako Giroan

Larunbatean hasiko da lasterketa, txirrindulari ataundarra tartean dela

Larunbatean (maiatzak 10) hasiko da Italiako Giroa, Palermon, taldekako erlojupekoarekin, eta han izango da Dioni Galparsoro txirrindulari ataundarra, Euskaltel-Euskadi taldearekin, gaur jakinarazi dutenez. Koldo Fernandez de Larrea eta Iñigo Landaluze izango dira Euskaltel-Euskadiren buruak. Galparsororekin eta bi buruekin batera, honakoek osatuko dute taldea: Aitor Galdos, Markel Irizar, Alan Perez, Ivan Velasco, Josu Agirre eta Lander Aperribai.

Erantzun 1

2008-03-15 | 21:29:59

Bi lagun zauritu dira Ataunen, trafiko istripuan

Zumarragako ospitalera eraman dituzte, larritasunik gabe baina kolpeekin

Gaur arratsaldeko 15:00etan bi autok talka egin dute Ataunen, Elemendi etxe parean. Istripuaren ondorioz autoetako batek etxea jo du, eta besteak pareko horma. Bi lagun zaurituta eraman dituzte Zumarragako ospitalera, larritasunik gabe, baina kolpeekin.

Ez du erantzunik

2008-02-09 | 19:40:10

Enrike Zurutuzak aurkeztu du Felipe Arinen biografia

Epaile ataundarraren bizitza aztertu du

Albaitaritzan eta kulturan lanean jardundako Enrike Zurutuzak (Ataun, 1917) gaur eguerdian aurkeztu du Ataungo udaletxean "D. Felipe Arin Dorronsoro (1881-1941). Epaile magistratua" liburua. Telleriazpi baserrian jaiotako Felipe Arinen bizitza ikertu eta bildu du Zurutuzak, abokatutzan eta magistraturan XX. mendearen lehen erdian famatu izan zen ataundarraren biografia osatuz.

2 erantzun

2008-01-09 | 09:45:53

Nondik herri aldizkaria berreskuratu du Atauniker taldeak

Herriko pertsonaiak, pasadizioak eta elkartearen lanak biltzen ditu 28. zenbakiak

Hamabost urtez itzalean egon ondoren, Atauniker elkarteak Nondik herri aldizkaria berreskuratu eta 28. zenbakia argitaratu du. Atzo iluntzean Ataunen egin zuten aurkezpenean azaldu zutenez, elkarteak egiten dituen lanen berri emateaz gain, herriko pertsonaien ibilbidea edota auzo ezberdinetako pasadizoak ere jasoko dituzte bertan. Atauniker elkarteak aldizkariaren 400 ale argitaratu ditu, eta interesa agertzen duten herritarren artean banatuko dituzte; horretarako, etxez etxe izena emateko orri bat banatuko dute.

Ez du erantzunik

2008-01-02 | 00:14:57

Pilar Barandiaran hil da, 96 urte zituela

Bizi osoa egin zuen osaba Joxemiel Barandiaranen ondoan

Atzo hil zen Pilar Barandiaran Ataungo Sara etxean, 96 urte zituela. 1911an jaio zen Pilar, San Gregorioko Perune zaharra baserrian. Betidanik bere osaba zen Joxemiel Barandiaranen ondoan egon izan da, baita honek errefuxiatuta ihes egin behar izan zuenean ere. Joxemiel Barandiaran Lapurdiko Sara herrira joan zenean, Pilar ere berekin joan zen, eta han bizi izan ziren biak urtetan, harik eta 1953an, atzera Atauna itzuli ziren arte. Urte horretan eraiki zuten Sara etxea, Lapurdin egon ziren etxearen oroimenez, eta han bizi izan da Pilar orain arte. 2006ko azaroan, omenaldia egin zion Barandiaran-Murkondo kultur elkarteak, Pilarrek urtetan “isilean egindako lana” eskertzeko. Ezagutu zutenek, bere eskuzabaltasuna eta etxera bisitan joaten ziren guztiei egiten zien harrera ona azpimarratu dituzte.

• Pilar Barandiarani elkarrizketa
• Bihar egingo diote azken agurra

Ez du erantzunik

2007-11-20 | 11:03:04

Aiako hilerria berritzeko lanak hasi ditu Udalak

Barrukaldea txukundu eta sarrera berri bate egingo diote

Ataungo Udalak egunotan hasi ditu Aiako hilerria zaharberritzeko lanak. Prozesu honetan, hainbat egokitzapen egingo dituzte. Batetik, hilerriaren sarrerako eskailerak eta barrukaldea txukunduko dituzte, zoru eta argiteria berria jarrita. Bestalde, "irisgarritasun neurriak kontuan izanik", beste sarrera bat ere egingo diote hilerriari, depositua dagoen aldetik.

Ez du erantzunik

2007-11-14 | 13:14:20

Mendiko argazkilaritza landuko du Lizarrusti parketxeak

Gema Arrugaetak gidatuta, bi hitzaldi eta mendi irteera egingo dituzte

Mendiak argazkilariari eskaintzen dizkion aukerak aprobetxatzen ikasteko hiru saio antolatu ditu Lizarrusti parketxeak datozen asteetarako. Bihar iluntzeko 19:00etan izango da aurrenekoa, San Gregorioko elkargunean. Bertan, Gema Arrugaeta argazkilari goierritarrak mendiko argazkilaritzak dituen sekretuak azalduko ditu. Igandean berriz, ikasgai hauek praktikan jartzeko mendi irteera egingo dute, Arrugaetak berak gidatuta. Azkenik, bihar zortzi, mendi ibilaldian ateratako argazkiak aukeratu eta aztertuko dituzte.

Ez du erantzunik

2007-11-05 | 12:16:16

Jendetza bildu du Ataungo mondeju egunak

Pili Barandiaranek irabazi du mondeju lehiaketa

Jende asko bildu zen atzo Ataunen, Mondeju eguneko ospakizunetan. Goiz osoan zehar, garai bateko bizimodua irudikatu zuten ataundarrek. Herritarrak baserritar jantziekin atonduta atera ziren kalera, eta antzinako lanbideekin erakusketa egin zuten. Lehengo eran landu zituzten artilea, egurra, ontziak eta mondejuak. Bestalde, herriko mondejuen II. lehiaketa ere egin zuten atzo. Aurreneko saria Pili Barandiaranek eraman zuen. Rosario Urdangarin bigarren gelditu zen eta Troskaeta tabernak jaso zuen 3. saria.

2 erantzun